التجارة الالكترونية | الربح من بيع المنتجات

السلام عليكم
الموضوع اللى فات الربح من بيع المنتجات فى موضوعنا التانى هنتكلم على التجارة الالكترونية بطريقة مبسطة و بأسهل الطرق, هنبتدى معاكم خطوة بخطوة و هنديكم وقت تطبقوا اللى اتعلمتوه و نتابع معاكم.
اول موضوع فى التجارة الالكترونية: ( بيع المنتج داخل بلد البائع )

الاساسيات:

1) المنتج: لو معنديش منتج ---------> " انتظر موضوع البيع بالسمسرة قريبا "

المنتج هوه الاساس لأن شغلنا كله هيقوم عليه, المنتجات بتتقسم لمنتجات يدوية و منتجات غير يدوية " مصنوعة عن طريق الآلات فى المصانع ".
ميزة المنتجات اليدوية انها مربحة جدا, و سهل عملها فى البيت بأقل الموارد, و ديه فرصة كويسة للبنات و السيدات انهم يستغلوا وقتهم فى عمل منتج و هم فى البيت.
فى ناس عندها فن التخييط و التطريز ممكن تصنع ( ملابس – مفارش – ستائر )
فى ناس عندهم هواية عمل الاكسسوارات ( عقد من الخرز – سلاسل من الصدف – اشياء كتير جدا )
فى ناس بتعمل اصناف طعام مميزة ( عمل أكلات و بيعها مثل المطاعم )
ده بالاضافة لكل الاعمال اليدوية اللى ممكن تتعمل فى البيت.
الافكار مش بتخلص, يبقى اول حاجة نفكر فى المنتج احنا بنعرف نعمل ايه و ايه المهارات اللى عندنا.
# تعلم الاشكال و التصاميم الجديدة:
هندخل على جوجل و نعمل بحث على المنتج بتاعنا, هنلاقى اشكال جديدة و افكار جديدة نزودها فى المنتج بتاعتنا, يعنى نحسن من الجودة و الشكل.

2) التسويق:
من أهم الخطوات انكم تصلوا للمستهلك و الزبون اللى معجب بالمنتج بتاعكم و بالتالى يشترى و التجارة تشتغل.
لو مش عامل للمنتج تسويق محدش هيعرف عنه حاجة و بالتالى محدش هيشتريه.
مثال علشان نعرف قوة التسويق:
الاعلانات على القنوات الفضائية, مثلا شركة زى بيبسى ليه كل شوية تجيب اعلاناتها فى التليفزيون مع انها شركة معروفة و مشهورة و مش محتاجة تعرف الناس بالمنتج " البيبسى "؟
لأن الاعلانات ليها قوة كبيرة على عقل المستهلك, لما يشوف اعلان المنتج امام عينه فى اليوم اكتر من 10 مرات صورة  المنتج هتتخزن فى عقله و يبقى فاكر دايما انه يشترى المنتج  ف مبيعات الشركة تزيد و الشركة تكسب اكتر.
احنا هنعمل كده, هنستخدم طرق تخلى المنتج امام عين الزبون و هنعرضه كذا مرة بطريقة متخلهوش يمل.

طرق التسويق:
طرق التسويق كتيرة جدا علشان كده هنركز على الطريقة المجانية و الاكثر شهرة

1) مواقع التواصل الاجتماعى أفضلهم فاعلية " الفيس بوك ":
الفيس بوك من اهم مواقع التسويق المجانى و المدفوع لإرتفاع عدد مستخدميه و دقة الاستهداف, علشان نسوق من عليه لازم نعمل صفحة و جروب, طب ليه صفحة و جروب؟

ميزة الصفحة هى انك لما تنزل بوست عليها يبان عند المعجبين فى ال " الصفحة الرئيسية " كمان ان شاء الله لما الصفحة يبقى عليها عدد كبير من الناس هنستخدم الاعلانات المدفوعة و ده هيحقق ربح اكثر, بس ديه خطوة متقدمة.

أما الجروب:
التفاعل عليه بيبقى عالى جدا و بتقدروا تجاوبوا على استفسارات الزبائن.
الاسم:
و احنا بنعمل البيدج " الصفحة " او الجروب لازم نراعى ان الاسم يكون ليه علاقة بالمنتج بتاعنا, الاسم هو نصف الطريق للنجاح فى تسويقه.
الوصف:
فى الوصف هنسلط الضوء على مميزات المنتج اللى بنقدمه و هنكتب بيانات الاتصال:
رقم التليفون او الايميل.
لو وصف البيدج الافضل ان يبقى فيها لينك الصفحة
و لو وصف الصفحة الافضل يبقى فيها لينك البيدج,
علشان نربط الاتنين ببعض, و كده يبقى زودنا عدد المعجبين بالصفحة و عدد الاعضاء.
# عملنا البيدج و الصفحة, لو مش هنقدر نتابع الاتنين يبقى الافضل نعمل جروب فقط, علشان التواصل مع الزبائن من اهم الحاجات اللى بتفرق فى التسويق, و الجروب بيوفر تواصل جيد عن الصفحة.

2) دوبيزل:

دوبيزل من اقوى المواقع و اسهلها لعرض منتجك او اى شىء تريد بيعه عقارات منتجات ملابس قديمة و مستعملة اى شىء يمكن بيعه على دوبيزل.

الصفحة الرئيسية لدوبيزل

مميزاته:
1) سهل التعامل و تواصل مباشر مع المشترى عن طريق الايميل او الهاتف.
2) مجانى.
3) لا يحتاج لمهارات.
عيوبه:
1) لا يوجد بيه مميزات مدفوعة مثل ظهور منتجك فى الصفحة الرئيسية او وضع إطار لمنتجك يشد الزائر.

أما المميزات اللى بيقدمها للمشترى:

متاح فى الدول الآتية:

3) سوق دوت كوم:

موقع فى اكثر من دولة عربية متخصص فى تسويق المنتجات, و من اقوى مواقع التسويق فى الوطن العربى.

الصفحة الرئيسية لسوق دوت كوم

مميزاته:

1) سهولة تعامل المشترى معاه.
2) بيحميك من اى سرقة او نصب من قبل المشترى و يضمن لك حقك عن طريق نظام " سيف باى ".
3) بيوفر لك خيارات وصف كل شىء عن المنتج و عرضه لاى فترة تريدها مجانا.
4) الامتيازات المدفوعة: وضع إطار محيط بالمنتج لجذب نظر الزائر, ظهور المنتج فى اولى النتائج و اخير جعل لون خلفية منتجك بلون آخر لجذب نظر الزائر.
5) إمكانية شحن المنتج على حسابك او على حساب المشترى.

عيوبه:
1) يتم خصم منك حوالى من 5 ل 10% من سعر المنتج رسوم بيع.

عرض المنتج:
1) الوصف: وصف المنتج بدقة كبيرة و التركيز على كل مميزاته و عدم اهمال اى تفاصيل.

2) الصور: مهمة جدا اكثر من الوصف " الصورة تغنى عن الف كلمة ", و يفضل ان تكون الصور بجودة عالية و اكتر من صورة للمنتج الواحد " من اكتر من زاوية ".

3) تسعير المنتج: يفضل البحث على الانترنت على منتجك ان وجد او المنتجات المشابهة لمعرفة السعر المناسب, و يفضل فى البداية البيع بسعر التكلفة او زيادة بسيطة للتميز, ده هيخلى ناس كتير تشترى و البيدج و الصفحة تشتهر و بعد كده لما البيدج او الجروب تشد حيلها و يبقى فى زبائن نبتدى نحط اسعار عادية و المنتجات اللى تاخد وقت كتير متتبعش ممكن نعمل عليها خصومات علشان تتباع.

4) فن التعامل مع الناس: احترام الناس و توفير الاجابات على كل أسئلة الزبائن , احترام مواعيد شحن المنتج او ارساله لهم.
ارسال بريد الكترونى بعد شحن المنتج للاطمئنان على رأى الزبون و اخذ تقييم الزبون للمنتج.

5) طريقة الدفع:
#  امكانية الدفع عند التوصيل و يفضلها اكثر الزبائن.
# فى حالة التعامل مع سوق دوت كوم يوفر الدفع اونلاين.

6) الشحن:
# سوق دوت كوم يوفر وسيلة للدفع عن طريق شركة " ارامكس ".
# اما فى حالة التعامل المباشر مع الزبون عن طريق الفيس بوك او دوبيزل, فى شركات بتوفر خدمة توصيل المنتج للزبون زى شركة " مشاوير " داخل مصر فقط, اما "ارامكس" فى حالة دولة غير مصر.
 

ملحوظة:
سعر الشحن البائع هوه اللى بيدفعه, علشان كده لما نيجى ننزل سعر المنتج ننزله و نكتب الشحن مجانا, او سعر المنتج كذا + رسوم الشحن.

اتمنى ان يكون شرحنا المتواضع نال اعجابكم و احنا حاولنا نلخص الموضوع على قد ما نقدر, لأن التجارة الالكترونية بحر واسع و محتاج عشرات المقالات بس زى ما وعدناكم احنا هنحاول ننزل اسهل الطرق و نعلى بالمستوى وحدة وحدة علشان الناس كلها تشارك و تستفاد.

مستنين تقييمكم للموضوع و لو فيه اى استفسار برجاء تركه فى كومنت البوست بتاع الموضوع اللى على صفحتنا فى الفيس بوك.

بالتوفيق و النجاح